Thursday, January 17, 2013

ලියුමයි..! බූට් එකයි....




  දැනට අවුරුදු බරගානකට කලින් ඒ කියන්නේ 90 දශකයේ ඔය සෙල්ෆොන් පඳුරක් පඳුරක් ගානේ තිබ්බේ නැහැ නොවැ. ඉතින් ප්‍රෙම වන්තයෝ තමන්ගේ පෙම් පනිවුඩ හුවමාරු කොරගත්තේ කොපි පොත්වල කොලවලටයි බොල්පොයින් පැනටයි පින්සිද්ද වෙන්ටයි. හැබැ ඉතින් තමන්ගේ කුමාරිකාවට සුපිරි අකුරුවලින් කොලේ පිරෙන්ට ආදර වැහි වස්සවන්ට කොලුපැටව් ෆුල් ට්‍රයි එක දුන්නැ කිව්වොත් එක ගල්පැලෙන බොරුවක් වෙනවනේව..!

  ලංකාව පුරා ඔය විදිහේ පෙම් ජවනිකා ඇතිවි නැතිවි යන අල්ල පනල්ලේ අපේ කොඩියත් ඉස්කොලේ යනවා, දැනටත් කොඩියගේ අත් අකුරු සුපිරි ඉතින් ඒකාලේ සිද්ද වෙච්චි හරි අපූරු සිද්දියක් තමයි මේ දිගහැරෙන්නේ...

    කොඩියගේ පංතියේ හිටපු යාලුවො දෙන්නෙක් බාලිකා ඉස්කොල දෙකක ගැනුලමයි දෙන්නේක්ට පන ඇරල කාටුකාගෙන තියෙන ඔක්කොම ශිල්ප ක්‍රම යොදාන තමන්ගේ හිතේ කැකැරෙන ආදරේ පුදකොරන්ට දතකෑව.

  ප්‍රේම කතාවේ මේ කුමාරිකාවෝ දෙන්නගෙන් එක් කුමාරිකාවක් අපේ යාලුවොත් එක්කම එකම ටියුෂන් පන්තිවලටමයි ආවේ ගියේ. හැබැ අනිත් කුමාරිකාව අපේ කොලුගැටයන්ට ඇහැගැටෙන්නේ සීමිත දවස් ගානකදි තමයි.

  ඔන්න ඉතින් මේ කොලුගැටවු දෙන්නටම අපේ කොඩියා බොක්කෙන්ම සපොර්ට් එක දුන්නා කාපු කටුවලින් අරික්කාලක් විතර වැටුනෙත් කොඩියගේ සාක්කුවට.

  නිතරම මුනගැහෙන කුමාරිකාවට බෑල්මට් එක දාගෙන හිටපු කොලු ගැටය කල් යල් බලලා වැඩේ ගොඩයන බව දැනගෙන තමන්ගේ ප්‍රථම ප්‍රේම සංදේශේ කුමාරිකාවට දිලා දැම්මා. ඔන්න ඉතින් කිරිගහට උල්පිහියෙන් ඇන්නහේ වැඩේ සුපිරියට ගොඩ ගියා..

 හැබැ වැඩේ කියන්නේ  අර කුමාරිකාව නොදන්න එකදෙයක් තිබුනා... පෙම් කොලේ තිබ්බ කිරි කිරි අකුරු අපේ කොඩියගේ බව, මොන කුමාරයද කැමති තමන්ගේ කුමාරිට දීපු මුල්ම පෙම් හසුන ලිව්වේ තමුන් නෙවෙයි කියලා කියන්ඩ. 

කොහොම හරි ඉතින් ඒ වැඩේ අවුලක් නැතුව ගොඩගියා කියමුකෝ....,

   නමුත් ප්‍රෂ්ණේ පටන්ගත්තේත් එතනින්ම තමයි…. නිතර මුන නොගැහෙන කුමාරිට බැල්මට් එක දාපු අනිත් කුමාරයත් දැන් හොඳකාලේ කියල හිතලා බොක්කටම වැදිලා හිටපු කුමාරිට තමන්ගේ ප්‍රථම පෙම් හසුන දුන්නා...

   කොලුගැටව් දෙන්නා නොදන්න කාරනාවකුත් ඔය අතරේ තිබුනා කුමාරියෝ දෙන්නා ගියේ පාසැල් දෙකකට උනාට ඒ කුමාරිකාවෝ දෙන්නම හොඳ යාලුවො බව

 දෙවැනියට හසුන ලබාගත්ත කුමාරිකාව තමන්ට ලැබුන මුල්ම පෙම් හසුනත් අරගෙන සිහිනෙන් වගේ ගියේ කලින් කිව්ව කුමාරිව මුලිච්චි වෙන්ට...හැබැයි වැඩේ පත්තු උනේත් මෙතෙන්දි තමයි..!  

දෙන්නත් එක්ක පෙම් හසුන කියවන්ට ගත්තා ලියුමේ අත් අකුරු දැක්ක ගමන් මුලින්ම සංදේශේ ලැබුන කුමාරි කියපි මගේ ලියුමෙත් තිබ්බේ මේ අත් අකුරුමයි කියලා... අර සිහින ලොකේ හිටපු කුමාරිකාව පියවිසිහියට ආවේ එතකොට,

  පුල් අප්සට් එකේ හිටපු කුමාරිකාව පහුවෙනිදම අපේ කොලු ගැටයව මුන ගැහුනා..

 "හාපුරාකියලා මම දෙයක් පටන්ගන්න ගියා නමුත් ඔයා පටන්ගන්න කොටම මට වංචා කලා කව්ද මේ ලියුම ලිව්වේ"

අසනිමහා වරුසාවක් කඩා වැටෙන්නැහේ තිබ්බ ආවේගෙට කුමාරිගේ ශ්‍රි මුවෙන් වචන කඩාපැන්නා

  ඉතින් කොලු ගැටය වෙච්චි සිද්දිය කියල දැම්මා නමුත් ඒ වැඩේ හරිගියේ නෑ ලියුමක් නැතුවම ආදර කතාව ජයගන්න තරමට වැඩේ සැට්වෙලා තිබ්බත් වෙච්චි සිදුවීමෙන් ඒ කතාව ලත්තැනම ලොප් උනා.!

හේම්....

නමුත් ......

කලින්ම සංදේශේ හුවමාරු කරගෙන නිතර මුන ගැහුන අනිත් කුමාරයයි කුමාරිගේයි පෙම් පලහිලව්වට නම් අවුලක් වුනේ නෑ කියල තමයි ආරංචී..!

හරි කතාව ඉවරයි…! එක හේයි කියමුකො.....

අපේ බ්ලොග් අයියල අක්කලා නංගිලා මල්ලිලා මාමලා නැන්දලා වෙන්ට තාත්තලා වෙන්ට අම්මලා ඔක්කොම මේ 27වෙනිදා ගම්පහ මල්වත්තට එන්ටලා ඇවිල්ලා ෆුල් ජොලියක් දාලා යන්ටලා….




   

Tuesday, January 1, 2013

ඉහලින්.....පහලට....!




රන්තැඹිලි ගසේ අත්තකට වී මෙතෙක් කරච්චලයක් වූ කපූටු තෙමේ ක්ෂනයෙන් නික්ම ගියේය.. උදැසන සිට වහින්නද පායන්නදැයි සිතමින් දෙලොවක් අතර සිරවී සිටි අහස හඬා වැටෙන්නට පටන්ගෙනය.... වසරක් පමණ ඉහල පරිසරයක දිවීගෙවු අප නැවත පහල වටාපිටාවකින් අලුත් අවුරුද්ද අරඹන්නට සියල්ල සැලසුම් කර අවසන්නය. වසරක් පමණ තරප්පු පඩි නගිමින් බසිමින් ගෙවූ අවදියට සමුදෙන්නට කාලය එළඹ ඇත. විසල් ගස්වලින් හෙබි පහළ වටාපිටාව අප පිළිගන්නට සැරසෙමින් සිටිනා අයුරු ඊයේ උදැසන එහි ගිය මාහට දැකගත හැකිවිය.

  හරිත මඩුලු අතරින් උස්වී පෙනුන කොන්ක්‍රිට් කුළුනු, නෙත් මානයෙන් ඔබ්බට බොඳවී යන අයුරු... උදැසන ළහිරු රැසින් වර්ණ ගැන්වු නැගෙනහිර අහස..... වළා රහිත නීල අහසේ දුටු දිදුලන තරු රටා....නෙතට හුරුවී තිබු මේ සියල්ල නෙතින් ගිලිහෙන්නටත්.., නීල අහස්තලය වසාගත් හරීත ගොන්නක් තුල කිමිදෙන්නටත්.. ඇත්තේ අතැඟිලි වලටත් වඩා අඩු දින ගනනකි. විසල් තණ පිටිය පුරා දිවයන්නටත් රූස්ස තුරු වදුළු අතරින් පිය මනින්නටත් සුපුරුදු රටාවෙන් මදකට මිදෙන්නටත් අවැසි සියල්ල දැන් සැකසී හමාරය .

නව වසර ලබන්නට ඔන්න මෙන්න කියා.... ජිවන රටාව තරමක් වෙනස් වීමම, සිතගත නැවුම්ව උද්දාමයෙන් ඉපිල යාමට ඉවල්වී ඇත....තවත් රහසකි, ඒ කැදැල්ලට අලුත් අමුත්තලු පහල විමේ නිමිත්තයි……

නව වසරේ අභියොගයන් බොහෝ හමුවනු ඇත. ඒවා සැහැල්ලුවෙන් ජයගත යුතුය…. දිය බුබුලකින් හටගෙන මහ මුහුද හමුවන තෙක් නෙක කඩයිම් පසුකරමින් ගලායන ගඟක් මෙන් ... මුහුද නැමති නිර්වානය.. සැනසුම හමුවන තෙක් ගලා යායුතුය මනුස්ස ජිවිතයේ අපුර්‍යත්වය එයයි...නැවුම් වසරකට පාතැබු පසු ඊලඟ වසරට ද අරමුනු සකසා ගත යුතුම වන්නේය මන්ද පා තැබු සැනින් නව වසර ගෙවී යන්නට පටන්ගන්නා බැවිනි.

   2012ක් ගතවී 13ක් උපදින නව වසර.., සියලුම ලෝවාසින්ට මෙන්ම හිතමිත්‍ර ඔබ සැමට...,  

නැවුම් අරමුනු ඉපැදෙන.. පෑතු අරමුනු සපිරෙන සැනසුමෙන් සපිරි…. 

වාසනාවන්ත ජීවන රටාවක් උරුම වේවායි...  පතමි ...!!!

ප/ලි 

     ඔබ මේ ලිපිය කියවන මොහොතේ අප එහි ගොසින්ය....!